रुपन्देही– बुटवलमा रहेको होराइजन चोकस्थित मिलिजुली पथमा हिंसात्मक घटना सार्वजनिक भएको छ ।
बुधबार बिहान एक महिलासहित उनका दुई छोरीको निर्मम हत्या भएको हो ।
इलाका प्रहरी कार्यालय बुटवलका अनुसार हत्या भएकी महिला ३४ वर्षीया दीपा बस्याल र उनका ७ वर्षीया छोरी स्नेहा तथा ४ वर्षीया छोरी हिमानी हुन् । घटनामा संलग्न व्यक्ति दीपाका पूर्वपति सुजन कोइराला रहेको खुलेको छ ।
सुजन केही वर्षअघि आफ्नै दाजुको हत्या अभियोगमा जेल परेका थिए । संविधान दिवसको अवसरमा उनी कैद माफी पाएर छुटेका थिए ।
सुजनले मंगलबार दीपालाई भेट्न आफ्नै बुटवलस्थित घरमा बोलाएका थिए । त्यसपछि बुधबार बिहान करिब ४ बजेतिर सुजनले घन र चक्कु प्रयोग गरी तीनै जनाको हत्या गरेका हुन् ।
प्रहरीले प्रारम्भिक अनुसन्धानमा दीपा र सुजनबीच पहिले विवाह भएको र पछि सम्बन्धविच्छेद भएको जनाएको छ । सम्बन्धविच्छेदपछि दीपाले नवलपरासीका शंकर ढकालसँग पुनः विवाह गरेकी थिइन् । हत्या गरिएका दुई बालिकाहरू शंकर ढकालका सन्तान हुन् ।
मृतक दीपा पाल्पाको तानसेन नगरपालिका-७ स्थित कुनसरे आधारभूत स्वास्थ्य केन्द्रमा कार्यरत स्वास्थ्यकर्मी थिइन् ।
प्रहरीले घटनास्थलबाट सुजन कोइरालालाई नियन्त्रणमा लिई थप अनुसन्धान थालेको छ ।
प्रतिक्रिया