काठमाडौं– निर्वाचन आयोगले गगन थापा नेतृत्वको नेपाली कांग्रेसको केन्द्रीय कार्यसमितिलाई मान्यता दिने निर्णय गरेको छ।

शुक्रबार दुवै पक्षसँग छलफलपछि आयोगले थापालाई सभापतिमा मान्यता दिने निर्णय गरेको हो। राजनीतिक दलसम्बन्धी ऐनको दफा ५१ अनुसार विवरण अद्यावधिक गरेर थापालाई मान्यता दिने निर्णय भएको आयोगले जनाएको छ।

गत पुस २७ देखि ३० गतेसम्म काठमाडौंको भृकुटीमण्डपमा थापाको अगुवाइमा विशेष महाधिवेशन आयोजना गरिएको थियो। विशेष महाधिवेशनले थापाको नेतृत्वमा नयाँ कार्यसमिति गठन गरेको थियो।

त्यसबारे थापासहितको पदाधिकारीको टोलीले बिहीबार आयोगमा निवेदन दिएका थिए। उनीहरूले विशेष महाधिवेशनका सबै विवरण बुझाएको थियो।

त्यस्तै, शुक्रबार शेरबहादुर देउवा नेतृत्वको कांग्रेस केन्द्रीय कार्यसमितिका पदाधिकारी र सदस्य पनि निर्वाचन आयोग पुगेका थिए। उनीहरूले पनि आधिकारिकताको दाबी गर्दै विवरण बुझाएका थिए।

त्यसपछि शुक्रबार अपराह्न आयोगका कार्यवाहक प्रमुख निर्वाचन आयुक्त रामप्रसाद भण्डारीसहित आयुक्तहरूले थापा नेतृत्वको टोलीसँग विशेष महाधिवेशनका विषयमा छलफल गरेको थियो।

उनीहरूसँगको छलफलपछि आयोगले आधिकारिकता दिने निर्णय गरेको हो।

निर्वाचन आयोगको यो निर्णयपछि असन्तुष्ट पक्ष सर्वोच्च अदालत जाने बाटो भने खुला छ ।