काठमाडौं– यशोदा फुड्सद्वारा उत्पादित करेन्ट चाउचाउले वाइवाइ चाउचाउको ट्रेडमार्क नक्कल गर्दै वाइवाइ जस्तै देखिने गरी उपभोक्तालाई झुक्याउने काम गरेको आरोप सिजीले लगाएको छ ।
वाइवाइ उत्पादक सीजी फुड्सले यशोदा फुड्सबाट कानुनको प्रत्यक्ष उल्लंघन भएको आरोप लगाएको हो । अन्तर्राष्ट्रिय गुणस्तर मापदण्ड कायम गरी चौधरी ग्रुपद्वारा उत्पादित वाइवाइ नेपालका साथै विभिन्न देशमा विक्री हुँदै आएको छ ।
करेन्ट चाउचाउले वाइवाइ जस्तै देखिने गरी र्यापर प्रयोग गरेर उपभोक्तालाई झुक्क्याएको आरोप छ ।
वाइवाइ जस्तै देखिने र्यापर प्रयोग गरी करेन्ट चाउचाउले ट्रेडमार्क ऐन २०२२ को उल्लंघन र उपभोक्ता अधिकारमाथि प्रत्यक्ष हनन गरेपछि सीजीले उद्योग विभागमा मुद्दा दायर गरेको जनाएको छ ।
पेटेन्ट, डिजाइन र ट्रेडमार्क ऐन २०२२ को दफा १६ (२) मा कुनै व्यक्तिको नाममा दर्ता भएको ट्रेडमार्क अरू कसैले नक्कल गर्न हुँदैन भनिएको छ ।
उपभोक्तालाई भ्रममा पार्ने गरी ट्रेडमार्क हुबहु नक्कल गरी प्रयोग गरेमा उक्त ऐनको दफा १९ अनुसार उद्योग विभागको आदेशले कसुरको मात्राअनुसार १ लाख रुपैयाँसम्म जरिवाना र सो कसुरसँग सम्बन्धित सबै मालसामान बजारबाट जफत हुने व्यवस्था गरेको छ ।
सीजी फुड्सले यही कानुनअनुसार करेन्ट चाउचाउमाथि कारबाही हुनुपर्ने माग गरेको छ । कानुनले यस सम्बन्धी निर्णय गर्ने अधिकारी उद्योग विभागका महानिर्देशकलाई तोकेको छ ।
पछिल्लो समयमा नेपाली बजारमा पनि स्थापित भइसकेका ब्रान्डको दुरुस्त हुने गरी ट्रेडमार्कको नक्कल गर्ने प्रवृत्ति मौलाउँदै गएको छ । स्थापित वस्तुहरूको ट्रेडमार्क हुबहु प्रयोग गर्ने र प्याकेजिंङ उस्तै देखिने गरी गरेर कम लागतमा धेरै मुनाफा आर्जन गर्ने विकृति बढेको छ ।
करेन्ट चाउचाउमा गोरखाका उपभोक्ताले किरा फेला पारेका छन्। गोरखा नगरपालिका-७ डण्डीडाँडामा उपभोक्ताहरूले चाउचाउ खान लाग्दा किरैकिरा फेला पारिएको थियो ।
लेखकको बारेमा
प्रतिक्रिया