पोखरा– आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक मतपत्रबाहेक ५२ प्रकारका निर्वाचन सामग्री गण्डकी प्रदेशका सबै ११ जिल्लामा पुगेको छ ।

प्रदेश निर्वाचन कार्यालय, पोखराका अनुसार सामग्री व्यवस्थापनको काम लगभग पूरा भइसकेको छ भने मतपत्र ढुवानीको प्रक्रिया पनि सुरु गरिएको छ ।

प्रदेश निर्वाचन कार्यालय पोखराका सूचना अधिकारी रुद्रनाथ न्यौपानेका अनुसार आज कास्की जिल्लामा मतपत्र आइपुगेको छ । उनले आइतबारदेखि कास्कीबाहेक अन्य जिल्लामा पनि मतपत्र ढुवानी सुरु हुने बताए ।

‘निर्वाचनका लागि आवश्यक ५२ प्रकारका सामग्री जिल्लामा पुगिसकेको छ । अब मतपत्रसमेत क्रमशः सबै जिल्लामा पठाइँदैछ,’ उनले भने, ‘निर्वाचन कार्यालय र मुख्य निर्वाचन अधिकृतको कार्यालय अन्तिम तयारीमा जुटेका छन् ।’

निर्वाचनमा प्रयोग हुने ५३ प्रकारका सामग्रीमध्ये ४९ प्रकारका सामग्री मतदान स्थलमा पठाइनेछन् भने बाँकी सामग्री सम्बन्धित कार्यालयमा प्रयोग गरिनेछ । मतपेटिका, मतदान गोप्य कक्षका सामग्री, छाप, रजिस्टर, मसीलगायतका सामग्री सुरक्षित रूपमा जिल्लागत रूपमा पठाइएको कार्यालयले जनाएको छ ।

सामग्री व्यवस्थापनसँगै निर्वाचनमा खटिने कर्मचारीको व्यवस्थापन पनि तीव्र पारिएको छ । गण्डकी प्रदेशमा यस पटक १४ हजारभन्दा बढी कर्मचारी परिचालन गरिने भएको छ । मतदान अधिकृत, सहायक मतदान अधिकृतलगायतका कर्मचारीलाई आवश्यक तालिम दिएर सम्बन्धित मतदान केन्द्रमा खटाइने सूचना अधिकारी न्यौपानेले बताए ।

प्रदेशभर एक हजार २९७ मतदान स्थल र दुई हजार ३९६ मतदान केन्द्र तोकिएका छन् । यस प्रदेशमा कुल मतदाता सङ्ख्या १८ लाख ७० हजार ६५ पुगेको छ ।

२०७९ सालको प्रतिनिधिसभा सदस्य निर्वाचनमा गण्डकी प्रदेशमा १६ लाख ६२ हजार २४६ मतदाता रहेका थिए । यस पटकको निर्वाचनमा दुई लाख सात हजार ८१९ नयाँ मतदाता थपिएका छन् । मतदाता सङ्ख्यामा भएको वृद्धिले निर्वाचन व्यवस्थापनलाई थप संवेदनशील र चुनौतीपूर्ण बनाएको निर्वाचन कार्यालयले जनाएको छ ।

गण्डकी प्रदेशमा कुल १८ प्रतिनिधिसभा निर्वाचन क्षेत्र रहेका छन् । सामग्री ढुवानी, कर्मचारी परिचालन र मतदाता शिक्षा कार्यक्रमलाई प्राथमिकतामा राखेर तयारी तीव्र बनाइएको कार्यालयको भनाइ छ ।

निर्वाचनलाई स्वच्छ, निष्पक्ष र व्यवस्थित रूपमा सम्पन्न गराउन सबै संयन्त्र परिचालन गरिएको प्रदेश निर्वाचन कार्यालयले जनाएको छ ।