एनआईसी एशिया बैंकको सीईओमा शाक्य नियुक्त

काठमाडौं– एनआइसी एसिया बैंकको प्रमुख कार्यकारी अधिकृतमा सुजित कुमार शाक्य नियुक्त भएका छन्। बैंकको सोमबार बसेको सञ्चालक समिति बैठकले शाक्यलाई सीइओको जिम्मेवारी दिएको हो।

शाक्यले ३० दिनभित्र बैंकमा सीइओको कार्यभार सम्हाल्ने छन्। बैंक सञ्चालक समितिले शाक्यलाई ४ वर्षे कार्यकालका लागि नियुक्त गरेको हो।

सीइओ नियुक्त भएपछि शाक्यले बैंकलाई थप उचाइमा पुर्‍याउन लाग्ने बताएका छन्। शाक्य अहिले नबिल बैंकको वरिष्ठ डेपुटी सीइओ हुन्।

उनले नबिल बैंकमा कामु प्रमुख कार्यकारी अधिकृतको जिम्मेवारी समेत सम्हालिसकेका छन्। शाक्यसँग बैंकिङको तीन दशक लामो अनुभव छ।

उनी नबिल आउनुअघि ग्लोबल आइएमइ बैंकमा थिए। त्यसअघि उनी जनता बैंकमा थिए। जनता ग्लोबलमा गाभिएपछि उनले केही समय काम गरेका थिए। उनले जनताअघि सिभिल बैंकमा पनि काम गरेका थिए।

एनआईसी एसियाकै पूर्वकर्मचारी समेत रहेका उनी पछिल्लो समय नबिल बैंकमा कार्यरत थिए। नबिल बैंकबाट तत्कालीन सीईओ अनिल कुमार शाह बाहिरिँदा उनलाई नै बैंकको कामु सीईओ बनाइएको थियो।

तर त्यसबेला पनि पछि ज्ञानेन्द्र ढुंगानालाई सीईओ बनाइएपछि उनी डेपुटी सीईओमा रहेका थिए। ढुंगाना पनि बैंकबाट बाहिरिएपछि डेपुटी रहेका मनोज कुमार ज्ञवाली सीईओमा नियुक्त भएका थिए भने शाक्य सिनियर डेपुटी सीईओको रुपमा कार्यरत थिए।

एनआइसीमा सीइओ रोशन कुमार न्यौपानेले राजीनामा दिएसँगै पद रिक्त थियो।