काठमाडौं– गाउँपालिका राष्ट्रिय महासंघको तेस्रो महाधिवेशनमा सहभागी जनप्रतिनिधिहरुले महासंघको नेतृत्वले स्थानीय तहका मुद्दा उठाउन नसकेको भन्दै असन्तुष्टि पोखेका हुन् ।
काठमाडौंस्थित प्रज्ञा भवनमा आइतबारदेखि सुरु भएको महाधिवेशनमा सहभागी हुन आइपुगेका जनप्रतिनिधिहरुले महासंघले महाधिवेशन र केन्द्रीय समितिको बैठकबाहेक गाउँपालिकाको हक, अधिकार लगायतका विषयमा अन्तर सरकारी समन्वय र लबिङ केही गर्न नसकेको गुनासो गरेका हुन् ।
नुवाकोटको सूर्यगढी गाउँपालिका अध्यक्ष सन्तबहादुर घलेले स्थानीय तहको निर्वाचनमा गाउँपालिका अध्यक्षहरुलाई निर्वाचन आयोगले जरिवाना गर्दा महासंघ चुइँक्क नबोलेको गुनासो गरे । उनले स्थानीय तहलाई नै धेरै अधिकार संविधानले दिएको भन्दै महासंघ छाता संस्था मात्रै भएको तर्क गरे ।
महासंघको कार्यशैलीप्रति असन्तुष्टि जनाउँदै कतिपय गाउँपालिकाका जनप्रतिनिधिहरु कार्यक्रममा सहभागी हुन आएका छैनन् । मकवानपुरको राक्सिराङ गाउँपालिकाका अध्यक्ष राजकुमार मल्ल र उपाध्यक्ष मञ्जु बुढाथोकी पनि कार्यक्रममा सहभागी हुन आएका छैनन् । गाउँपालिकाको हकहितका लागि केही गर्न नसक्ने महासंघमा सहभागी हुनुको अर्थ नरहेको मल्ल र बुढाथोकीको भनाइ छ ।
महासंघका अध्यक्ष होमनारायण श्रेष्ठले यो अधिवेशनबाट ६ वर्षका लागि नयाँ नेतृत्व चयन हुने बताउँछन् । अधिवेशनमा वित्तीय संघीयता, प्रशासनिक संघीयता, अन्तर सरकार सञ्चालनका चुनौती र सवाल लगायतका विषयमा छलफल हुने छ ।
मंगलबारसम्म सञ्चालन हुने महाधिवेशनको उद्घाटन प्रधानमन्त्री शेरबहादुर देउवाले गरेका थिए ।
लेखकको बारेमा
प्रतिक्रिया