काठमाडौं– नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले एमसीसीकै कारण गठबन्धन टुट्ने खतरा भएको भन्दै एमसीसीलाई पनि टुंगो लगाएर सत्ता गठबन्धन जोगाउने अन्तिम प्रयासमा आफू रहेको बताएका छन् ।

माओवादी सशस्त्र युद्धका पहिलो शहिद दिलवहादुर रम्तेलको स्मृतिमा शनिवार पेरिसडाडामा आयोजित कार्यक्रममा प्रचण्डले जसलाई प्रतिगमनकारी भनेर ठूलो संघर्षबाट गठबन्धन बनाइयो, अहिले उही शक्ति (एमाले) हाबी हुने खतरा देखिएको बताएका हुन् ।

प्रचण्डले भने, ’एमसीसीको समस्या समाधान होस, गठनबन्धन पनि नटुटोस् भन्ने कुनै उपाय छ कि भनेर अन्तिम प्रयास गरिरहेका छौं । नत्र एमसीसीकै कारण हामीले हिजो जसलाई प्रतिगमनकारी भन्यौ, जुन कदमलाई प्रतिक्रान्तिकारी भन्यौ, जसको भण्डफोर गरेर नयाँ गठबन्धनको जन्म भयो फेरि त्यही शक्ति फर्किने खतरा छ ।’

अहिलेको सत्ता गठबन्धन राष्ट्रियता,संविधान र लोकतन्त्र बचाउन बनेको भन्दै त्यसबेला एमसीसी कहिँ कतै नरहेको प्रचण्डले बताए । गठबन्धन र सरकार बनिसकेपछि पनि साझा कार्यक्रममा कहिँ कतै एमसीसीको चर्चा नगरिएको उनको भनाइ रहेकाे थियाे ।