काठमाडौं– काठमाडौं महानगरपालिकाका नगर प्रहरी प्रमुख राजु पाण्डेको निलम्बनपछि तनाव हुनसक्ने आकलन गर्दै सुरक्षाका लागि नेपाल प्रहरीको टोली खटाइएको छ ।

जिल्ला प्रहरी परिसर काठमाडौंका एसपी तथा प्रवक्ता अपिलराज बोहराले सुरक्षाका लागि भने प्रहरीको टोली खटाइएको बताए ।

‘अहिलेसम्म केही पनि भएको छैन । कुनै तनाव हुनसक्ने आकलन गरेर मात्रै प्रहरीको टोली पठाएका हौं,’ एसपी बोहराले भने ।

प्रमुख प्रशासकीय अधिकृत सरोज गुरागाईंले पाण्डेलाई ६ महिनाका लागि निलम्बन गरेका थिए ।

त्यसपछि निमित्त प्रमुखको जिम्मेवारी विष्णु जोशीलाई दिइएको छ । यस्तो अवस्थामा महानगरमा केही सुरक्षा चुनौती हुनसक्ने भन्दै प्रहरीको टोली खटाइएको हो ।

उता उपमेयर सुनिता डंगोल एक कार्यक्रममा सहभागी हुन विराटनगर गएकी छन् भने प्रशासकीय अधिकृतको मोबाइल अफ छ ।

महानगरमा सशस्त्र पुगेपछि केहीबेर माहोल असामान्य बनेको थियो ।