काठमाडौं– राष्ट्रिय स्वतन्त्र पार्टी (रास्वपा) सभापति रवि लामिछानेले आफ्नो पार्टी अब झनै परिपक्व भएर अघि बढ्ने बताएका छन् ।

चितवनमा भएको महाधिवेशनबाट निर्विरोध निर्वाचित भएका लामिछानेले शपथ ग्रहणपछिको सम्बोधनको क्रममा यस्तो बताएका हुन् ।

‘प्रतिबद्धताका साथ हामी भन्न चाहन्छौँ, पहिलो ऐतिहासिक महाधिवेशनबाट राजनीतिक रूपमा वैधानिकता प्राप्त गरेको देशकै सबैभन्दा ठुलो झन्डै दुई तिहाइको सरकार सरकार सञ्चालन गरिरहेको रास्वपा परिपक्व भएर अघि बढ्नेछ,’ लामिछानेले भने ।

उनले यो ४ वर्षमा केही कमजोरी भएका र अब त्यसलाई सधैँ देखिने गरी अघि बढ्न नहुने जिकिर गरे ।

‘जे भयो आज हामी त्यहीँ छौँ । जुन किसिमका कमी कमजोरी हामीले यो ४ वर्षमा छुटायौँ, त्यो चिज हाम्रा कार्यक्रममा देखिन थालेका छन् । तर, यो सधैँ देखिन हुँदैन,’ उनले भने ।

निर्वाचन भइसकेपछि एउटा परिणाम आउने बताउँदै जित हारलाई क्षणिक कुराको रूपमा लिन आग्रह गरे ।

‘निर्वाचन गइसकेपछि त्यसले एउटा परिणाम त दिइहाल्छ । प्रतिस्पर्धीका रूपमा हामीले लड्नैपर्छ । सभापतिका रूपमा मैले कुनै पनि अधिवेशनहरूमा आफूलाई प्रत्यक्ष संलग्न नगराई हेर्ने प्रयास गरेँ,’ उनले भने, ‘यो पहिलो महाधिवेशन भएकाले हाम्रो संगठन कस्तो अवस्थामा छ भन्ने हेर्नु थियो । हामी कहाँ रहेछौँ भन्ने कुरा आन्द्राभुँडी थाहा पाउनु थियो । सभापतिका रूपमा अत्यन्तै महत्त्व राख्ने कुरा रहे । तमाम कमजोरीका बाबजुद पनि जसरी धैर्यता राख्नुभयो, धेरै धेरै धन्यवाद ।’