काठमाडाैं- बुढानीलकण्ठ नगरपालिकाले आर्थिक वर्ष २०८२/८३ का लागि ‘स्वच्छ, शान्त, समृद्ध र पर्यटकीय नगर’ निर्माणको लक्ष्यसहित नीति तथा कार्यक्रम सार्वजनिक गरेको छ।

नगर प्रमुख मिठाराम अधिकारी, उप–प्रमुख अनिता लामा र प्रमुख प्रशासकीय अधिकृत अजय बर्तौलाको संयुक्त नेतृत्वमा प्रस्तुत यो योजना नगरको समावेशी, उत्तरदायी र नागरिक–केन्द्रित शासन प्रणालीतर्फको स्पष्ट कदम हो।

नगरपालिकाको १६ औँ नगरसभामा सार्वजनिक गरिएको नीति तथा कार्यक्रममा स्वास्थ्य, शिक्षा, पूर्वाधार, युवा सशक्तीकरण, वातावरण संरक्षण र सामाजिक न्यायलाई प्राथमिकतामा राखिएको छ।

नगर अस्पताललाई चौबीसै घण्टा सेवा दिने योग्य बनाउँदै विशेषज्ञ सेवा, सुरक्षित मातृत्व, नवजात शिशु, मानसिक स्वास्थ्य, अपांगता तथा ज्येष्ठ नागरिकका लागि घरमै सेवा पुर्‍याउने योजनाहरू अघि सारिएका छन् ।

स्वास्थ्य पहुँच अझ प्रभावकारी बनाउन ‘मेयरसँग ज्येष्ठ नागरिक’ नामक कार्यक्रम सञ्चालन गरिने बताइएको छ । नगर प्रमुख अधिकारी स्वयंले प्रत्येक वडाका ज्येष्ठ नागरिकसँग संवाद गर्दै उनीहरूको स्वास्थ्य र सामाजिक अवस्था बुझ्ने र आवश्यक सेवा सुनिश्चित गर्ने प्रतिबद्धता जनाएका छन्।

निःशुल्क क्यान्सर स्क्रिनिङ, पोषण सेवा, फार्मेसीसँग सहकार्य, सामुदायिक स्वास्थ्य बीमा तथा डिजिटल हेल्थ प्रोफाइल निर्माण पनि योजनामा समावेश छ। शिक्षा क्षेत्रमा पूर्वाधार सुधार, डिजिटल माध्यमबाट पठनपाठन, प्रौढ साक्षरता, छात्रवृत्ति, शिक्षक तालिम र ‘एक वडा, एक पुस्तकालय’ कार्यक्रम सञ्चालन गरिनेछ।

‘भर्चुअल कक्षा’ र ‘शिक्षक प्रोत्साहन कार्यक्रम’ जस्ता नवप्रवर्तनले सार्वजनिक विद्यालयलाई गुणस्तरीय शिक्षाको केन्द्र बनाउने लक्ष्य लिएको छ।उप–प्रमुख लामाले भनिन्, ‘शिक्षा नै सबै विकासको जरो हो। यसपालिको योजना त्यसैलाई मूर्त रूप दिनेछ।’

‘स्वदेशमै बसौं, स्वदेशमै गरौँ’ नारासहित नगरले युवाका लागि सीप विकास तालिम, स्टार्टअप फन्ड, इन्टर्नसिप, करियर परामर्श केन्द्र, व्यावसायिक तालिम र रोजगारी मेला सञ्चालन गर्ने योजना बनाएको छ।

प्रमुख प्रशासकीय अधिकृत बर्ताैलाका अनुसार नगरभित्रै रोजगारी सिर्जना गरी वैदेशिक पलायन घटाउनु यो वर्षको मुख्य उद्देश्य हो। सडक, नाला, ढल व्यवस्थापन, खानेपानी, हरियाली विस्तार र फोहोरमैला व्यवस्थापन योजनाहरू यस वर्ष प्राथमिकतामा छन्।

प्रमुख प्रशासकीय अधिकृत बर्ताैलाले भने, ‘पूर्वाधारको विकाससँगै हामी सेवा प्रवाहमा डिजिटल रूपान्तरणको यात्रा पनि सुरु गर्दैछौं। नगर सूचना प्रणाली, मोबाइल एप्स, बजेट ट्र्याकिङजस्ता उपायहरू नागरिकको विश्वास जित्ने सशक्त माध्यम हुनेछन्।’

महिला, दलित, अपांगता भएका व्यक्ति, ज्येष्ठ नागरिक, द्वन्द्वपीडित र अल्पसंख्यक समुदायका लागि लक्षित कार्यक्रमहरू समावेश गरिएका छन्। कानुनी सहायता, सुरक्षित आवास, आत्मरक्षा तालिम तथा स्वरोजगार अभिमुखी कार्यक्रमद्वारा नगरले सामाजिक न्याय र सम्मानजनक जीवनका आधार बनाउने प्रतिबद्धता जनाएको छ।

खेलकुदको क्षेत्रमा ‘नगर शिल्ड’, ‘एक वडा एक खेलमैदान’, अपांगता मैत्री खेलकुद, प्रतिभावान खेलाडीको सम्मान, र नगरस्तरीय प्रतियोगिताहरूको आयोजना गरिनेछ। साथै सांस्कृतिक सम्पदाको संरक्षण र स्थानीय कला–संस्कृति प्रवर्द्धन गर्ने कार्यक्रम पनि अघि सारिएको छ।

नगरपालिकाले सार्वजनिक गरेको नीति तथा कार्यक्रम विस्तृत, समावेशी र व्यवहारिक छ। नगरप्रमुख अधिकारी, उपप्रमुख  लामा र प्रमुख प्रशासकीय अधिकृत बर्तौलाको समन्वयात्मक नेतृत्वले योजना कार्यान्वयनमा गति दिने अपेक्षा गरिएका छन् ।

यस पटकको कार्यक्रम केवल कागजमा सीमित नरही ‘आहा बुढानीलकण्ठ’ भन्ने अनुभूति नगरवासीका जीवनशैलीमा प्रत्यक्ष झल्किने गरी कार्यान्वयन हुनसक्यो भने, नगरपालिका देशभरिका पालिकाहरूका लागि नमुना स्थानीय सरकार बन्ने निश्चित देखिन्छ ।