गोरखा– एसियाली विकास बैंक ‘एडिबी’को करिब ६१ करोड रुपैयाँ सहयोगमा भूकम्प सहायता आयोजना अन्तर्गत निर्माण भइरहेको लुइँटेल भञ्याङ–आँपपिपल–हर्मी–थालाजुङ हुँदै भच्चेक जाने सडकमा सवारी रोक लगाइएको छ ।

उक्त सडक कालोपत्रेको काम सुरु भएकाले दैनिक बिहान १० देखि दिउँसो ४ बजेसम्म सवारी आवागमनमा रोक लगाइएको हो । जिल्लामा यातायात गुरुयोजनाले पहिलो प्राथमिकता दिएको यो सडक खण्ड असार मसान्तैमा स्तरोन्नति सकिनु पर्ने भए पनि ७५ प्रतिशत मात्र काम सम्पन्न भएको छ ।

दुई वर्ष अघि ठेक्का सम्झौता भई स्तरोन्नतिको काम सुरु भएको सडक पहिलो खण्डको करिब ७० र दोस्रो खण्डको ७५ प्रतिशत काम सकिएको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाई गोरखाका प्रमुख रामशरण आर्चायले जानकारी दिए।

‘गाडी चलाउँदा निर्माणाधीन सडकको संरचनामा क्षति पुग्ने र काममा अवरोध हुने अवस्था आयो’ उनले भने ‘प्राविधिक र व्यवहारिक दुवै कुरालाई हेरेर उक्त समयमा सवारी नचाउन आग्रह गरिएको हो ।’ वैकल्पिक सडक नभएकाको कारण उक्त समय बाहेक अन्य बेलामा भने सवारी चलाउन छुट दिइएको उनले बताए ।

३० किलोमिटर मध्येको सडक खण्ड पहिलो १७ किलोमिटर कामको ठेक्का लामा अमर जेभी र दोस्रो खण्डको १३ किलोमिटरको ठेक्का लामा कन्स्ट्रक्सन दिइएको छ ।

यो सडक क्षेत्र न २ को पालुङटारदेखि अजिरकाेट गाउँपालिकाको भच्चेक हुँदै लमजुङसम्म रहेको छ । तर, नयाँ गाउँबाट भच्चेक हुँदै लमजुङ जाने सडक खण्ड पनि निर्माण कार्य भइरहेको छ ।