काठमाडौं– संघीय सचिवालय निर्माण तथा व्यवस्थापन कार्यालयको नाम धेरैलाई थाहा नहुन सक्छ, तर यसभित्र भइरहेको अनियमितता र भ्रष्टाचारले सुशासनको आधार नै हल्लाइरहेको छ।

तर, यसभित्र हुने अनियमितता र कुकृत्यले सुशासनको तल्लो स्तरको नमुना देखाउँछ । भिआइपीका सुविधामा रहने यो कार्यालयले सामान्य नियमसमेत पूरा नगरी काम गरिरहेका हुन्छ । तर, यसबारे कुनै पनि तहले चासो राखेको पाइँदैन ।

कार्यालय प्रमुख सुपरिटेन्डेन्ट इन्जिनियर चक्रवर्ती कण्ठ, नायब सुब्बा सुनिलकुमार रोकाय, इन्जिनियर उमेश चौधरी र लेखा प्रमुख रामकुमार श्रेष्ठको मिलेमतोमा ब्रह्म लुट भइरहेको छ । उनीहरूले सामान सप्लायर्सहरूसँग मिलेर अकुत आर्जन गरिरहेका छन् । उनीहरूका विषयमा  निकायमा पनि उजुरी परेको छ । तर, पैसाको भरमा उनीहरूले सबै क्षेत्र सामसुम पारेका छन् ।

केही दिन अगाडि अख्तियार दुरुपयोग अनुसन्धान आयोगले पनि उक्त कार्यालयमा छापा हानेको थियो । सम्पूर्ण कागजातमा स्ट्रिङ अपरेसन गरिएको थियो । तर, भिआइपीको ओछ्यानदेखि शौचालयसम्म रेखदेख गर्ने भएका कारण सोही पहुँचमा कर्मचारीहरूलाई कारबाही भएको छैन ।

त्यसो त पटक पटक विभिन्न सञ्चारमाध्यमले पनि यो विषय उठान गरिरहेको छ ।  अनौठो कुरा बिचौलियाहरू पो सञ्चारमाध्यममा यस्तो समाचार नलेख्न धम्की दिन आउने गरेका छन् । सरोज अधिकारी जो नेपाली काँग्रेसका नेता पनि भन्न रुचाउँछन् । खासमा उनी सामान सप्लायर्स हुन् ।

उनले विभिन्न सञ्चारमाध्यमका पत्रकारलाई धम्क्याएका हुन् ।  कांग्रेस निकट नै रहेका सुब्बा रोकायले बिचौलिया सप्लायर्स अधिकारीलाई त्यहाँ उठतीको लागि लगेको एक कर्मचारीले बताए ।

त्यसो त बिचौलिया अधिकारीले सञ्चारमाध्यमलाई फोन गरेर यो विषय मिलाउनु पर्छ भन्नुले पनि अनियमितताको पुष्टि हुन्छ ।  कर्मचारी प्रशासनको जिम्मेवारीमा रहेका सुब्बालाई स्टोरको पनि जिम्मा दिनुले पनि गडबड भएको स्पष्ट हुन्छ ।

कर्मचारी युनियनका नेताहरूलाई खुसी पार्नु पर्छ भन्दै सुब्बाले भागबन्डामा धेरै लिएपछि केही समय पहिले समस्या पनि भएको थियो । यस विषयमा कार्यालय प्रमुख भने आरोप मात्र भएको प्रतिक्रिया दिन्छन् ।