काठमाडाैं– प्रभु बैंक लिमिटेडका ‘कर्पोरेट एन्ड प्रोजेक्ट फाइनान्स’ विभागका प्रमुख दिनेश डंगोल बैंकिङ कसुर मुद्दामा पक्राउ परेका छन् ।

अशोक शेरचन समेत संलग्न रहेको भनिएको बैंकिङ कसुर मुद्दाको अनुसन्धानका क्रममा डंगोललाई प्रहरीको विशेष टोलीले पक्राउ गरेको हो ।

ललितपुर महानगरपालिका–२७ (साबिक सुनाकोठी) स्थायी घर भएका ५० वर्षीय डंगोललाई काठमाडाैंको थापाथलीबाट पक्राउ गरिएको केन्द्रीय अनुसन्धान ब्युरोले जनाएको छ ।

प्रहरीका अनुसार डंगोलले बैंकको विभागीय प्रमुखको हैसियतमा रहँदा नेपाल राष्ट्र बैंकको निर्देशन र प्रचलित कानुन विपरीत कार्य गरेको पाइएको छ । उनले प्रभु बैंकबाट प्रभु म्यानेजमेन्टलगायतका संस्थाहरूमा प्रवाह भएको कर्जा दुरुपयोग गर्ने र गराउने कार्यमा संलग्न रहेको तथ्य प्रमाणहरू संकलन भएपछि पक्राउ गरिएको सूचना अधिकारी प्रहरी वरिष्ठ उपरीक्षक शिव कुमार श्रेष्ठले जानकारी दिए ।

विज्ञ टोलीले गरेको अध्ययन र विश्लेषणका आधारमा उनीमाथि बैंकिङ कसुर तथा सजाय ऐन, २०६४ अन्तर्गतको कसुरमा अनुसन्धान अघि बढाइएको छ ।

डंगोललाई पक्राउ गर्न उच्च अदालत पाटनले अनुमति दिएको थियो । पक्राउ परे लगतै उनलाई अदालतमा उपस्थित गराइएको र थप अनुसन्धानका लागि म्याद थप भई हिरासतमा राखिएको प्रहरीले जनाएको छ ।

कसुरमा बैंकका अन्य उच्च पदस्थ अधिकारीहरू समेत अनुसन्धानको घेरामा रहेका छन् । प्रभु बैंक र यससँग सम्बन्धित कम्पनीहरू वीच भएको शंकास्पद आर्थिक कारोबार र कर्जा प्रवाहबारे प्रहरीले सूक्ष्म अनुसन्धान गरिरहेको छ ।