पोखर– पोखरा महानगरपालिका अन्तरगतको स्वास्थ्य महाशाखामा तालाबन्दी गरिएको छ।

महानगरपालिकाले अन्यायपूर्ण तरीकाले अवकाश दिएको भन्दै संघर्षरत स्वास्थ्यकर्मीहरूले मंगलबार स्वास्थ्य महाशाखामा तालाबन्दी गरेका हुन् ।

महानगरपालिकाले करारका कर्मचारीहरूलाई हटाउने निर्णय गरेसँगै महानगरपालिका अन्तरगतका स्वास्थ्य चौकी र क्लिनिकहरूमा कार्यरत ५९ कर्मचारीहरू निरन्तर रूपमा आन्दोलित छन् ।

गत मंसिर २८ गते बसेको पोखरा महानगरपालिकाको विशेष नगरसभाले माघ १ गतेदेखि करारका कर्मचारी हटाउने र लोकसेवा आयोगको सिफारिस परेका वैकल्पिक उम्मेदवारहरूलाई महानगरमा काममा लगाउने निर्णय गरेको थियो ।

महानगरको उक्त निर्णयविरुद्ध स्वास्थ्यका कर्मचारीहरू सर्वोच्च अदालत पुगेका थिए । सर्वोच्चले गएको माघ १३ गते अर्को आदेश नआएसम्मका लागि करारका कर्मचारी हटाउने निर्णय कार्यान्वयन नगर्न अल्पकालीन अन्तरिम आदेश गरेको छ ।

तर, पोखरा महानगरपालिकाले करार तोडिसकिएको अवस्थामा अब उक्त करारलाई निरन्तरता दिन नसकिने भन्दै आन्दोलनरत स्वास्थ्यका कर्मचारीहरूलाई काममा फर्कन दिएको छैन ।

तर आन्दोलनरत स्वास्थ्यका कर्मचारीहरू महानगरपालिकाले सर्वोच्चको अन्तरिम आदेशलाई समेत लत्त्याएर कार्यान्वयन नगरेको भन्दै आन्दोलन गरिरहेका छन् र त्यही आन्दोलनको निरन्तरताका रूपमा उनीहरूले पोखरा महानगरपालिकाको स्वास्थ्य महाशाखामा तालाबन्दी गरेका हुन् ।

माघ १० गते बसेको नगर सभाबाट संघ, प्रदेश सरकारसँगको साझेदारी तथा अन्य संघ संस्था साझेदारहरूसँगको सहयोग तथा साझेदारीमा सञ्चालित कार्यक्रमका लागि भन्दै हटाइएका तीन कर्मचारीलाई महानगरले हाजिर गराएको छ ।

आन्दोलनरत कर्मचारीले अदालतको अल्पकालीन अन्तरिम आदेशको पालना गर्न र निकालिएका करार कर्मचारीलाई निशर्त पुनः बहाली गर्न माग गरेका छन् ।

नीति, विधि र प्रक्रिया विपरीत मनोमानी तरिकाले शुभलाभका आधारमा विना प्रतिस्पर्धा नियुक्ति गरिएका तीन जना स्वास्थ्यकर्मीको नियुक्ति बदर गर्नसमेत उनीहरूको माग छ ।