काठमाडाैं- मंसिर १५ देखि सुरु हुने नेपाल प्रिमियर लिग (एनपीएल)को ‘टाइटल स्पोन्सर’ बनेको सिद्धार्थ बैंक भड्किलो प्रचारबाजीका कारण राष्ट्र बैंकको निगरानीमा तानिएको छ।
एनपीएल नेपाल क्रिकेट संघ (क्यान)को आयोजनामा हुँदैछ। एउटै संस्थाका लागि दुई करोड रुपैयाँभन्दा माथिको विज्ञापन प्रायोजन गरेमा राष्ट्र बैंकले बिगोसहित जरिवाना गर्दै आएको छ। यस्तोमा नेपाल राष्ट्र बैंकले तोकेको विज्ञापन गर्न पाइने सीमाभन्दा माथि गएर बैंकले एनपीएलमा टाइटल स्पोन्सरसिप लियो।
सिद्धार्थ बैंक मुख्य प्रायोजक बनेको जानकारी दिन गएको गत शुक्रबार आयोजना गरिएको पत्रकार सम्मेलनमा क्यानका सचिव पारस खड्काले सिद्धार्थ बैंक पाँच वर्षका लागि एनपीएलको मुख्य प्रायोजक रहकाे र, नेपाली खेलकुदमा अहिलेसम्मकै कीर्तिमानी रकममा सम्झौता भएको दाबी गरेका थिए।
याे पनि,
पक्राउ पुर्जी जारी भएपछि ‘सिद्धार्थ बैंकका अध्यक्ष’ फरार !
सिद्धार्थ बैंकका अध्यक्ष मनोजकुमार केडियाले पनि सहकार्य गर्ने अवसर दिएकोमा क्यानलाई धन्यवाद दिँदै पाँच वर्षपछि पनि यो सहकार्य जारी रहने प्रतिवद्धता जनाए। क्यान र बैंकले सम्झौता रकम नखुलाए पनि बैंकले क्षमताभन्दा बाहिर गएर प्रायोजन गर्न लागेको देखिएको छ। उच्च स्रोतहरूका अनुसार सिद्धार्थ बैंक र क्यानबीच ४ करोड रुपैंयाको सम्झौता भएको छ। पक्राउ पुर्जी जारी भएपछि बैंकका अध्यक्ष केडिया फरार छन् । उनी फरार रहकै अवस्थामा उक्त कार्यक्रममा उपस्थित भएका थिए।
अन्य तीन बैंकले पनि एनपीएलको मुख्य प्रायोजक बन्न चासो देखाएको भए पनि सिद्धार्थ बैंकले अप्रत्याशित रकम प्रायोजनको प्रस्ताव गरेसँगै अरू बैंक पछि हटेको बताइएको छ। सिद्धार्थ बैंकले वार्षिक चार करोड रुपैयाँसहित पाँच वर्षमा कुल २० करोड रुपैयाँको मुख्य प्रायोजन बन्न लागेसँगै अन्य बैंक पछि हटेका थिए। राष्ट्र बैंक वृत्तमा भने सिद्धार्थ बैंकले एनपीएलको प्रमुख प्रायोजक बन्नका लागि १ अर्ब रुपैयाँसम्मको प्रस्ताव गरेको चर्चा हुने गरेको छ।
सिद्धार्थ बैंक मुख्य प्रायोजक बन्नका लागि एनपीएलमा एक अर्ब रुपैयाँ खर्च गर्न लागेको खबर सुनेको राष्ट्र बैंक डेपुटी गभर्नर बमबहादुर मिश्रलाई उदृत गरेका विवरण सतहमा आएका छन्। सञ्चालक समितिले उचित देखेमा कुनै पनि इभेन्टको प्रायोजन वा विज्ञापन गर्न बैंक वित्तीय संस्थाहरूले सक्छन्। यो कुनै नौलो कुरा भएन।
खराब कर्जा बढि, लगानीकर्तालाई प्रतिफल दिन नसक्ने
अर्थतन्त्रमा आएको समस्याले बैंक वित्तीय संस्थाहरूको खराब कर्जा बढिरहेको, पुँजीकोषमा दबाब र लगानीकर्तालाई प्रतिफल दिन नसकिरहेको अवस्थामा एउटै प्रायोजनमा कुनै पनि बैंकले दुई करोडभन्दा बढी विज्ञापन दिनु गलत हुने पनि बताइन्छ। सिद्धार्थ बैंकले भने एनपीएलको मुख्य प्रायोजक बन्न खर्च गर्न लागिएको रकम चर्चा भएजस्तो ठूलो नभएको दाबी गरेको छ।
गत असोज ११ र १२ गते गएको बाढीपहिरो र डुबानपछि सिद्धार्थ बैंकले २५ लाख रुपैयाँ दैवी प्रकोप राहत कोषमा जम्मा गरेको थियो। बैंकले आफ्नो संस्थागत सामाजिक उत्तरदायित्व (सीएसआर) अन्तर्गत गत वर्षको नाफाबाट एक प्रतिशत रकम कोषमा योगदान गर्नसक्ने भएपनि बैंकले २५ लाख रुपैयाँमात्रै दिएको थियो। यस्तो सहयोगको काममा यति न्यून रकम खर्च गरेको बैंकले एउटा लिगका लागि त्यति ठूलो रकम सम्झौता गर्नुले पनि आशंका बढेको बताउनेहरू छन्।
मुलुकको अर्थतन्त्रमा लगानीको माहोल नबन्दासम्म विज्ञापनकै भरमा ठूलो मात्रामा कर्जा विस्तार गरेर बैंकको नाफामा उल्लेखीय उभार आउने सम्भावना नभए पनि बैंकले गर्न लागेको प्रायोजनले बैंकको वित्तीय स्थितिमा प्रभाव पार्ने देखिन्छ।
गत वर्षको पहिलो त्रैमासमा ४३ करोड खुद नाफा गरेकोमा यस वर्षको सोही अवधिमा ३८ करोड २१ लाख रुपैयाँमात्रै नाफा गरेको छ। खराब कर्जा बढेकाले बैंकको गत वर्षको अवितरित नाफासमेत जोडेर बैंकको वितरणयोग्य नाफा २६ करोड ३४ लाख रुपैयाँमात्रै रहेको छ।
अहिलेको अवस्थामा सुधार नभएमा बैंकले यस वर्षको नाफाबाट लगानीकर्तालाई प्रतिफल दिने सम्भावना न्यून छ।
