काठमाडौं– संस्कृति, पर्यटन तथा नागरिक उड्यनमन्त्री बद्री पाण्डेले आफ्नै दलका सांसद राजेन्द्र बजगाईविरुद्ध पार्टी कार्यालयमा उजुरी दर्ता गरेका छन् ।
कांग्रेसका प्रतिनिधि सभा सदस्य बजगाईंले कुप्रचार गरेको भन्दै मन्त्री पाण्डेले केन्द्रीय कार्यालय सानेपामा उजुरी दिएका हुन् ।
मन्त्री पाण्डेका सचिवालयमार्फत पार्टीको अनुशासन समिति र संसदीय दलमा उजुरी दिइएको छ । पाण्डेको उजुरी केन्द्रीय कार्यालयका सचिव प्रेम केसीलाई बुझाइएको छ ।
सांसद बजगाईंले मन्त्री पाण्डेले घुस खाएको आरोप लगाएका थिए । सामाजिक सञ्जालमा बजगाईंले मन्त्री पाण्डेले भैरहवामा क्यासिनोका लाइसेन्स वितरण गर्ने क्रममा घुस खाएको आरोप लगाएका थिए ।
उजुरीमा आफूविरुद्ध निराधार आरोप लगाइएको पाण्डेले लेखेका छन् ।
याे पनि,
मन्त्री पाण्डेले सांसद बजगाइँमाथि लगाए ‘बिचौलिया’को आरोप, घुस लिएको प्रमाणित गर्न चुनौती
कांग्रेस सांसद बजगाईंको आरोप: ‘पर्यटनमन्त्री पाण्डेले घुस लिएर क्यासिनोको लाइसेन्स बाँडे’
