काठमाडौं- नेपाल समाजवादी पार्टी (नेसपा) ले गण्डकी प्रदेश सरकारलाई कानून बमोजिम नै विश्वासको मत दिएको र फ्लोर क्रस गरिएको प्रचारबाजीबाट भ्रमित नहुन आग्रह गरेको छ।
नेसपा केन्द्रीय प्रवक्ता कृष्ण शर्माले सोमबार प्रेस विज्ञप्ति जारी गर्दै नेसपा गण्डकी प्रदेश सभा सदस्य फणीन्द्र देवकोटाले मुख्यमन्त्री सुरेन्द्रराज पाण्डेलाई दिएको मत संविधानसम्मत भएको जनाए।
‘गण्डकी प्रदेश सभामा नेपाल समाजवादी पार्टीले संविधान र कानुनले दिएको अधिकार प्रयोग गरी विश्वासको मत दिएको अवस्था हो । नेपाल समाजवादी पार्टीले संविधानको मर्म, भावना र मौजूदा कानूनी व्यवस्था बमोजिम गरेको निर्णयलाई फ्लोर क्रस भनी गरिएको प्रचारबाजीबाट भ्रमित नहुन सम्पूर्ण जनसमुदायमा हार्दिक अपिल गर्दछौं ।’ विज्ञप्तिमा उल्लेख छ ।
‘हाम्रो पार्टीले गत आम निर्वाचनमा नेपाली कांग्रेस, नेकपा माओवादी केन्द्रसहित गठबन्धन गरी चुनावमा भाग लिएको कुरा बिदितै छ। नेपाल समाजवादी पार्टी र नेकपा (माओवादी केन्द्र) नेपालको संविधान धारा १७ को उपधारा (२) खण्ड (ग) र राजनैतिक दलसम्बधी ऐन २०७३ को दफा ४९ ले दिएको अधिकार प्रयोग गरी दलको छुट्टै स्वतन्त्र अस्तित्वसहित चुनावमा सहकार्य भएको थियो,’ शर्माद्वारा जारी विज्ञप्तिमा भनिएको छ, ‘यस सन्दर्भमा नेपाल समाजवादी पार्टीको निर्देशन र जनताले आम निर्वाचनमा दिएको जनादेश बमोजिम हाम्रो पार्टीका प्रदेश सभा सदस्य फणीन्द्र देवकोटाले विश्वासको मत दिनु भएको हो। यस अवस्थामा उहाँले दिनु भएको विश्वासको मतलाई आधार बनाएर अन्य दलले ह्वीप जारी गरी कारबाही गर्न मिल्ने अवस्था होइन।’
नेसपाले फणीन्द्र देवकोटाले गोरखा २ (१) मा उम्मेदवारी दर्ता गर्दा नै मनोनयन फाराममा नेपाल समाजवादी पार्टीको तर्फबाट उम्मेदवार भनेर जनाएको बताएको छ।
विज्ञप्तिमा भनिएको छ, ‘स्मरण रहोस्, गत निर्वाचनमा नेपाल समाजवादी पार्टीले आफ्नो चुनावी नारा र घोषणा पत्रसहित जनतामा मत मागेको थियो । जनताले नेपाल समाजवादी पार्टीको उम्मेदवार र एजेण्डालाई विजयी गराई अनुमोदन गरेका थिए । निर्वाचनमा गोरखा २ (१) मा उम्मेदवारी दर्ता गर्दा नै फणीन्द्र देवकोटाले मनोनयन फाराममा नेपाल समाजवादी पार्टीको तर्फबाट उम्मेदवार भनेर जनाउनु भएको थियो। निर्वाचनपश्चात निर्वाचन आयोगले उहाँलाई नेपाल समाजवादी पार्टीको विजयी सांसद भनी प्रमाण पत्र र परिचय पत्र दिएको हो । निर्वाचन आयोगमा भएको अभिलेखमा समेत नेपाल समाजवादी पार्टीका प्रदेश सभा सदस्य भनेर उल्लेख गरेको अवस्था छ।’
पाण्डेलाई विश्वासको मत दिएका माओवादीको चुनाव चिन्हबाट निर्वाचित नेसपाका सांसद फणीन्द्र देवकोटाको प्रदेशसभा सदस्य पद धरापमा परेको छ ।
देवकोटाको पद धरापमा
गोरखा २ (१) बाट निर्वाचित देवकोटाले माओवादी संसदीय दलको ह्वीप उल्लंघन गर्दै मुख्यमन्त्री पाण्डेलाई विश्वासको मत दिएका छन् । उनको मतले पाण्डेको पद जोगियो, तर उनको पद भने नजोगिन सक्छ ।
राजनीतिक दलसम्बन्धी ऐनको दफा ४९ बमोजिम उनलाई माओवादी संसदीय दलको ह्वीप लाग्छ । उक्त दफामा दुई वा दुईभन्दा बढी दलले एकल चुनाव चिन्ह लिई निर्वाचनमा भाग लिन सक्ने भनेको छ ।
सो ऐनमा जुन दलले बढी सीट प्राप्त गर्छ, त्यसको नाममा एउटामात्र संसदीय दल गठन हुने भनेको छ । त्यसअनुसार गण्डकी प्रदेशसभा सदस्य देवकोटा माओवादी संसदीय दलकै सदस्य मानिने कानूनविद्हरुको दाबी छ ।
ऐनको सोही दफाको उपदफा ४ मा विश्वासको मत दिनेलगायतका काममा दलको ह्वीप उल्लंघन गरेमा त्यस्तो सदस्यले दल त्याग गरेको मानिने प्रस्ट उल्लेख छ ।
देवकोटालाई माओवादी संसदीय दलको ह्वीप उल्लंघन गरेकोमा पार्टीले दल त्याग गरेको सूचनासहित उनलाई प्रदेशसभा सदस्यबाट हटाउन सभामुखसमक्ष सूचना दिएमा उनी पदमुक्त हुनेछन् ।
