काठमाडौं– गण्डकी प्रदेशका मुख्यमन्त्री सुरेन्द्रराज पाण्डेले आज विश्वासको मत लिदै छन् । मुख्यमन्त्री पाण्डेले आज अपराहन्न ३ बजे बस्ने प्रदेश सभाको बैठकमा विश्वासको मत लिने कार्यसूची रहेको छ ।
गण्डकीका तत्कालीन मुख्यमन्त्री खगराज अधिकारीले लिएको विश्वासको मतलाई असंवैधानिक घोषणा गर्दै सर्वोच्च अदालतले पाण्डेलाई मुख्यमन्त्रीमा नियुक्त गर्न परमादेश जारी गरेको थियो ।
पाण्डे नेपालको संविधानको धारा १६८ को उपधारा ३ बमोजिम मुख्यमन्त्रीमा नियुक्त भएका थिए । उनले विश्वासको मत नपाएको खण्डमा गण्डकीमा पनि उपधारा ५ बमोजिमको सरकार गठन हुनेछ ।
गण्डकीमा विश्वासको मतका लागि ३१ सांसदहरुको समर्थन आवश्यक छ । तर, कांग्रेससँग २७ सिटमात्रै छ । कांग्रेसलाई २ सिट रहेको राप्रपा र स्वतन्त्रको एक मत प्राप्त भएपनि बहुमत पुग्ने देखिदैन । गण्डकीमा एमालेको सभामुखसहित २२ र माओवादी केन्द्रको ८ सांसद रहेका छन् ।
१६ जेठमा मुख्यमन्त्री नियुक्त भएका पाण्डेसामु सरकारको नीति तथा कार्यक्रम र १ असारमा बजेट ल्याएर मात्र विश्वासको मत लिने सुविधा थियो । किनकि संवैधानिक व्यवस्थाअनुसार विश्वासको मत लिने ३० दिन १३ असारमा पुग्छ ।
तर मुख्यमन्त्री पाण्डेले सरकारको नीति तथा कार्यक्रम र बजेट ल्याउनु अगाडि नै विश्वासको मत लिने निर्णय लिए । नेताहरूका अनुसार बिहीबारसम्म पनि विश्वासको मत लिइहाल्ने कि नीति तथा कार्यक्रम र बजेट ल्याएर मात्र भन्ने अलमलमा थिए । शीर्ष नेताहरूसँग छलफल गरेपछि विश्वासको मत लिएरै नीति तथा कार्यक्रम र बजेट ल्याउने निर्णय लिएका हुन् ।
तर मुख्यमन्त्री पाण्डेले राप्रपा (२), स्वतन्त्र सांसद दीपक मनाङेसँगै माओवादीको चुनाव चिह्वबाट विजयी नेपाल समाजवादी पार्टीका सांसद फणिन्द्र देवकोटाको समर्थनमा विश्वासको मत प्राप्त गर्ने रणनीति बनाएका हुन् ।
मनाङेले टाउको हल्लाउनसाथ मन्त्री पाउँछन् तर मुख्यमन्त्री पाण्डेलाई अझै एकजना सांसदको समर्थन चाहिन्छ। त्यो भनेको देवकोटाको समर्थन हाे। तर, फणिन्द्र माओवादी केन्द्रको चुनाव चिह्नबाट उम्मेदवार भइ विजयी बनेका सांसद हुन्।
संविधानको धारा १६८ (३) अनुसार फ्लोर क्रस हुनसक्ने अवस्था छैन ।
यदि मुख्यमन्त्री पाण्डेले विश्वासको मत पाएनन् भने यो सरकार ढल्छ र प्रदेश प्रमुख डिल्लीराज भट्टले संविधानको धारा १६६ (५) बमोजिम बहुमत पुर्याउन सक्ने कुनै एक प्रदेश सभा सदस्यलाई मुख्यमन्त्री नियुक्त गर्नका लागि आह्वान गर्ने छन् ।
