गोरखा– ‘वैदेशिक रोजगारीको पीडा : बेखबर श्रीमती, न्याय खोज्दै श्रीमान’ शीर्षकमा जेठ १ गते गोरखा सन्देश मा समाचार प्रकाशित भएपछि विभिन्न प्रतिक्रिया प्राप्त भए।

विशेषगरी वैदेशिक रोजगारीमा रहेका युवा–युवतीहरूको पारिवारिक सम्बन्ध, आर्थिक व्यवस्थापन र विश्वाससँग जोडिएका विषयमा धेरै पाठकले आफ्नो धारणा व्यक्त गरेका छन्। कतिपयले यस्ता घटना सामान्य बन्दै गएको बताएका छन् भने केहीले सम्पत्ति लिएर सम्पर्कविहीन हुने घटनाबारे पनि टिप्पणी गरेका छन्।

हामीले अजिरकोट गाउँपालिका–५, मुच्चोकका एक पीडित युवाको विषयमा समाचार प्रकाशन गरेपछि उनले आफ्नो अनुभव समेटेर एउटा लेख पठाएका छन्। उनको लेखलाई सामान्य सम्पादन गरी यहाँ प्रस्तुत गरिएको छ।

हाम्रो समाजमा महिला मात्र होइन, पुरुष पनि विभिन्न प्रकारका पीडामा परिरहेका छन्। विशेषगरी वैदेशिक रोजगारीमा गएका व्यक्तिहरूको जीवनमा यस्ता घटना देखिन थालेका छन्।

समाजमा भइरहेका घटनाले धेरै पुरुषहरू सचेत बन्न थालेका छन्। कतिपयले आफ्नो सम्पत्ति सुरक्षित राख्ने उपायबारे सोच्न थालेका छन्।

सबै महिला गलत हुन्छन् भन्न मिल्दैन। तर केही व्यक्तिका गलत व्यवहारका कारण असल महिलाहरू पनि आलोचनाको सिकार बन्ने अवस्था देखिएको छ। जीवनसाथीप्रतिको विश्वास टुट्दा त्यसले व्यक्तिको मानसिक अवस्था र सामाजिक सम्बन्धमा गम्भीर असर पार्न सक्छ।

वैदेशिक रोजगारीको पीडा विदेशमा बसेर संघर्ष गर्नेहरूलाई मात्र थाहा हुन्छ। आफ्नो परिवारसँग बसेर सुखद जीवन बिताउने चाहना कसलाई हुँदैन र ? तर परिवारको राम्रो भविष्यका लागि धेरै नेपाली युवा–युवतीहरू विदेशिन बाध्य छन्।

विदेशमा चर्को गर्मी, कठिन श्रम र लामो समयको कामका बीच आफ्ना परिवारको खुसीका लागि पैसा कमाइरहेका हजारौं नेपाली छन्। उनीहरूले पसिना बगाएर पठाएको रकम दुरुपयोग हुँदा पीडा हुनु स्वाभाविक हो।

यस्तै पीडा भोगेको दाबी गर्छन् मुच्चोकका दीपक देवकोटा।

उनका अनुसार, मुच्चोकटार निवासी सीताराम धितालकी छोरी मनिषा धितालसँग २०७२ साल वैशाख १० गते सामाजिक परम्पराअनुसार विवाह भएको थियो। विवाहपछि उनीहरू करिब एक वर्ष सँगै बसे। त्यसपछि दीपक वैदेशिक रोजगारीका लागि विदेश गए भने मनिषा काठमाडौंको ढुंगेधारामा बस्न थालिन्।

दीपकका अनुसार, उनले श्रीमतीमाथि विश्वास गर्दै विदेशमा कमाएको रकमबाट चितवनको पार्वतीपुरमा मनिषाकै नाममा जग्गा खरिद गरेका थिए।

विदेशबाट फर्किएपछि आर्थिक कारोबारबारे जानकारी लिन खोज्दा विवाद सुरु भएको उनको भनाइ छ। उनले मनिषाले आफ्ना भाइ सरोज धिताल र बुहारी कविता धिताललाई बोलाएर कोठामा रहेको नगद रकम, केही सुनका गरगहना तथा आफ्ना व्यक्तिगत सामग्री लिएर सम्पर्कविहीन भएको आरोप लगाएका छन्।

उनले पार्वतीपुरस्थित १० धुर जग्गा (कित्ता नं. २९९८) पनि आफूलाई जानकारी नदिई आफ्नै नातेदार चुडामणि ढकाललाई नामसारी गरिएको दाबी गरेका छन्।

दीपकका अनुसार, यस विषयमा प्रश्न गर्दा मनिषाले आफूलाई अपमानजनक जवाफ दिने गरेको बताउँछन्।

हाल मनिषा बागमती सरसफाइ तथा सहरी विकाससम्बन्धी कार्यालयमा निजामती कर्मचारीका रूपमा कार्यरत रहेको दीपकको दाबी छ।

उनले पहिले सञ्चारमाध्यममा यस्ता घटना सुन्ने र पढ्ने गरे पनि आफ्नै जीवनमा यस्तै घटना घट्दा स्तब्ध भएको बताएका छन्।

दीपकको प्रश्न छ, ‘यदि कुनै व्यक्ति वास्तवमै पीडित छ भने उसले न्याय कहाँबाट पाउने ? श्रीमान वा श्रीमती, जोसुकैको गलत व्यवहार भए पनि त्यसको निष्पक्ष छानबिन र न्याय सुनिश्चित हुनुपर्दैन र ? सम्बन्धित निकायहरू किन मौन छन् ?’