गोरखा– सरकारले भूकम्प पछि घर संरचना निर्माण गर्दा भवन आचारसंहिताको कडाइका साथ पालना गराउने भने पनि गोरखा सदरमुकाममा अहिले पनि जथाभाबी रूपमा भवन संरचना निर्माण गर्ने क्रम रोकिएको छैन ।

गोरखा नगरपालिकाको नगरपालिका भित्र बन्ने भवन आचारसंहिता कडाइका साथ पालना गराउनु पर्ने दायित्व भए पनि त्यसको कार्यान्वयन भने खुकुलो देखिएको छ ।

गोरखा सदरमुकामको मुख्य सडक छेउछाउमै भवन आचारसंहिता विपरीतका भवन संरचना निर्माण भइरहेका छन् । तर नगरपालिकाले भने आचारसंहिता कार्यान्वयन गर्ने बताए पनि त्यसको खासै वास्ता गरेको नपाइएको स्थानीयबासीहरूले भनाई छ ।

गत वैशाख १२ गते गएको विनाशकारी भूकम्पमा परि भत्किएका राजधानी सहित विभिन्न जिल्लामा बनेका पक्की भवनहरूले भवन आचारसंहिता पालना नगरेको पाइएको थियो ।

गोरखा नगरपालिकाले भवन आचारसंहिता कडाइका साथ पालना नगर्दा सदरमुकाममा जथाभाबी भवन बन्ने क्रम नरोकिएकाले वरपरका स्थानीयबासीहरू समेत त्रासमा परेको उनीहरूको भनाई छ ।